चीनबारे ओली सरकारको प्रयास असफल पार्दै प्रचण्ड सरकार!

काठमाडौं, १० असोज । चिनियाँ राष्ट्रपति सी जिनपिङलाई नेपाल भ्रमण गराउन आवश्यक पर्ने गृहकार्य नेपाली   पक्षले गर्न सकेको छैन् ।
 तत्कालिन केपी ओली नेतृत्वको सरकारले चिनियाँ राष्ट्रपति नेपाल आउने वातावरण तयार पारेपनि भारतको शुभेच्छामा बनेको अहिलेको प्रचण्ड सरकारले भ्रमणको कुनै तयारी नगर्दा भ्रमण नहुने देखिएको छ ।
सीको भ्रमण स्थगित भएको भन्ने समाचारको नेपाल र चीन दुवैले खण्डन गरेका भए पनि नेपालले गर्नुपर्ने तयारी पनि गरेको छैन ।
‘चीनसँग भएका पछिल्ला सन्धिसम्झौता कार्यान्वयनका प्रयास न अघिल्लो सरकारले अघि बढायो न अहिलेकोले तयारी गरेको छ,’ परराष्ट्रका एक अधिकारीले भने । यसअघि भएका सम्झौताको प्रोटोकल तयार गर्नेदेखि दुईपक्षीय बैठक बस्नेसम्मका कुनै पनि काम अघि नबढ्नुको अर्थ नेपालका तर्फबाट तयारी नै नहुनु रहेको उनले बताए ।
परराष्ट्र सचिव शंकरदास बैरागीलाई चीनसँगको सम्झौता अघि बढाउने र ‘फलो’ गर्ने जिम्मेवारी अघिल्लो (ओली) सरकारले दिएको थियो । तर, चिनियाँ राष्ट्रपतिको सम्भावित भ्रमण तिथि नजिकिँदै गर्दा सचिव बैरागी नै काठमाडौंमा छैनन् ।
परराष्ट्रमन्त्रीसँगै न्युयोर्क पुगेका उनी त्यसपछि ब्रसेल्स भ्रमणको तयारीमा छन् । सामान्य कूटनीतिक अभ्यासमा परराष्ट्रमन्त्री र परराष्ट्र सचिव विशेष परिस्थितिबाहेक विदेश भ्रमणमा निस्कँदैनन् । यसबाट पनि परराष्ट्रले चिनियाँ राष्ट्रपतिको भ्रमणलाई गम्भीरतापूर्वक नलिएको देखिने प्रधानमन्त्री कार्यालयका अधिकारीले बताए ।
स्रोतका अनुसार चीनले कूटनीतिक शैलीमा असन्तुष्टि जनाउँदै भनेको छ, ‘नेपालको कूटनीतिक छलफल र गति यतिबेला व्यस्त छ । चिनियाँ डेक्स प्रमुख यतिबेला मन्त्रालयमा सचिवको कार्यभारमा व्यस्त हुन परेको अवस्था छ ।’
कान्तिपुर दैनिकमा समाचार छ ।