पहिलो उडान नै भरिभराउ

भाद्र ३, २०७३- नेपाल वायुसेवा निगमले चार वर्षपछि बिहीबारदेखि युएईको दुबईमा पुन: उडान सुरु गरेको छ । निगमको पहिलो उडान भरीभराउ उडेको थियो ।
निगमको संस्थागत विभागका अनुसार, विहीबारदेखि सुरु पहिलो उडानमा १ सय ५८ सिट सबै भरिएका थिए भने दुबईबाट शुक्रबार विहान फर्किदा १ सय ३७ यात्रु थिए । निगमको दुबई आठौं उडान गन्तव्य हो । राष्ट्रिय ध्वजाबाहक कम्पनीले सातामा तीन दिन आइतवार, मंगलबार र बिहीबार काठमाडौंबाट उडान भर्नेछ भने दुबईबाट त्यसको भोलीपल्ट सोमबार, बुधबार र शुक्रबार फर्किने उडान तालिका राखेको छ । काठमाडौंबाट राति साढे ११ बजे दुबईका लागि विमान उडने छ भने दुबईबाट उडेको उक्त विमान विहान साढे १० बजे काठमाडौं अवतरण गर्ने छ ।
काठमाडौंदेखि दुबईसम्मको उडान अवधि ४ घण्टा ४० मिनेट रहेको छ । त्यसैगरी दुबईबाट काठमाडौं फर्किदा ४ घण्टा १५ मिनेटको उडान अवधि छ । यो रुटमा दुई सेट पाइलट राखिएका छन् । निगमको सगरमाथा नामको एयरबस उडाएर क्याप्टेनहरु आरपी ढकाल र श्रवण रिजाल विहीबार दुबई पुगेका थिए भने उताबाट सुवाष रिजाल र विजय लामाले विमान ल्याएका थिए ।
निगमले काठमाडौं–दुबई–काठमाडौं उडानबाट बैदेशिक रोजगारीमा जाने नेपाली र तेस्रो मुलुकबाट नेपाल घुम्न आउने पर्यटकलाई लक्षित गरेको छ । निगमले यस रुटबाट एक वर्षमा ४० हजार ५ सय २८ यात्रुलाई सेवा दिने लक्ष्य राखेको छ । यसबाट मात्रै करिब १ अर्ब रुपैयाँ आम्दानी हुने अनुमान छ ।
निगमले ०४१ माघदेखि सुरु गरेको दुवई उडान यात्रालाई विमान अभावले ०६९ भदौं १२ मा २८ वर्षपछि बन्द गरेको थियो । सुरुका दिनमा काठमाडौं–कराची–दुबई उडान थियो । निगमले दुईटा बोइङ्ग खरिद गरेपछि युरोपको फ्राकंफर्टसम्म पुगेको थियो । त्यसताका बोइङ्ग काठमाडौंबाट दुबई हुँदै फ्राकंफर्ट पुग्ने र सोही रुट हँुदै फर्कन्थ्यो ।

अहिले निगमका दुईवटा एयरबस ए–३२० र एउटा बोइङ्ग–७५७ बाट हङकङ, मलेसियाको क्वालालम्पुर, थाइल्याण्डको बैंकक, भारतको नयाँदिल्ली, बैंगलोर, मुम्वई र कतारको राजधानी दोहामा उडान भर्दै आएको छ । डेढ वर्ष यता भारतको राजधानी नयाँदिल्ली, मुम्बई र बैङलोरमा उडान सुचारु गरेको थियो ।
सरकारी तथ्यांक अनुसार, मध्यपूर्वी क्षेत्र युएईमा करिब ३ लाख नेपाली कामदार छन् । त्यहाँका सातवटा इमिरेट्समध्ये दुबईमा नेपालीको बाहुल्यता छ । यसअघि  दुबई–काठमाडौं–दुबई त्यहाँको सरकारी स्वामित्वको फ्लाई दुबई एयरलाइन्सले दैनिक तीन वटा उडान गर्दै आएको थियो । कामदार चल्ने सिजनमा यो विमानले मात्रै नपुगेर धेरै नेपाली एयर अरबियाको उडानमा सारजाहा, कतार एयरवेजबाट दोहा, ओमन एयरबाट मस्कट, इत्तिहाद एयरबाट आबुदाबी हुँदै दुबई/काठमाडौं आउजाउ गर्छन् ।