रसियाद्वारा तेस्रो विश्वयुद्ध शुरु भएको अनौपचारिक संकेत ,अ

सिरियालाई लिएर बढ्दो तनावबीच रसियालाई तेस्रो विश्व युद्धको डरले पिरोलेको छ। उसले आफ्ना सबै अधिकारीहरुलाई निर्देशन जारी गर्दै विदेशमा रहेका आफ्ना नातेदार र परिवारका सबै सदस्यहरुलाई स्वदेश फर्काउन भनेको छ।

रसियाली सञ्चारमाध्यमका अनुसार देशका उच्च अधिकारीहरुले यो चेतावनी राष्ट्रपति भ्लादिमीर पुटिनबाट जारी भएको पुष्टि गरेका छन् । अधिकारीहरुका अनुसार राष्ट्रपतिको कार्यालयले लिखित नोटिश नै जारी गरेको छ ।

तेस्रो विश्वयुद्धको कारण सिरिया
रसियन समाचार अनलाइन जान्का डटकमको रिपोर्टमा भनिए अनुसार पुटिनले यो कदम आफ्नो फ्रान्स भ्रमण अचानक रद्द गरेपछि चालेका हुन् ।

सिरियामा जारी संघर्षलाई लिएर मस्कोको भूमिकाको आलोचना भइरहेका बेला पुटिनले फ्रान्सको भ्रमण रद्द गरेका थिए । उनी अघिल्लो साता पेरिस जाने तयारीमा थिए ।

फ्रान्सका राष्ट्रपति फ्रान्स्वा ओलान्दले हालै क्रेमलिन सिरियामा युद्ध अपराधमा लिप्त रहेको आरोप लगाएका थिए । फ्रान्सेली राष्ट्रपतिको यही भनाईका कारण पुटिनले फ्रान्सको भ्रमण रद्ध गर्ने निर्णय लिएको बताइएको छ ।

अन्तरराष्ट्रिय सञ्चारमाध्यमका अनुसार तनाव बढ्दै गएपछि रसियाले पोल्यान्डसँग सीमाना जोडिएको क्षेत्र नजिकै आणविक क्षमतायुक्त मिसाइल पनि तैनाथ गरेको छ ।

यसै महिनाको शुरुवातमा पुटिनका एक मन्त्रीले आफूहरुले मस्कोका १२ लाख मानिसलाई सुरक्षित स्थानमा राख्नका लागि आणविक बंकर बनाएको जनाएका थिए ।

पूर्व सोभियत नेता मिखाइल गोर्बाच्येभले पनि रूस र अमेरिकाबीच तनाव बढिरहँदा विश्व एक खतरनाक मोडमा पुगेको चेतावनी दिएका थिए ।

रुसले जारी गरेको अर्डर कस्तो हो ?

रिपोर्टका अनुसार प्रशासनिक कर्मचारी, प्रान्तीय कर्मचारी, सांसद्हरु र जन संस्थानहरुका कर्मचारीहरुका लागि अर्डर जारी गरेर विदेशी स्कूलमा पढिरहेका आफ्ना बालबालिका र त्यहाँ रहेका सबै नातेदारहरुलाई तुरुन्त स्वदेश फर्काउन भनिएको हो । यदि यो निर्देशन नमानेमा कर्मचारीहरुले आफ्नो बढुवाको अवसर पनि गुमाउनुपर्ने चेतावनी दिइएको छ ।

रिपोर्टमा यस्तो आदेश जारी गर्नुको भित्री कारण भने प्रष्ट भइनसकेको जनाइएको छ । यसको एउटा कारण आफ्ना नागरिकलाई पश्चिमाको प्रभावबाट बचाउन पनि हुन सक्ने बताइएको छ ।

तर पनि रसियन राजनीतिक विष्लेशक स्तानिसलभ बेलकोवस्कीले भने यो अर्डर ठूलो युद्धका लागि देशमा एलिट क्लास तयार गर्ने उपायको एउटा हिस्साकारुपमा रहेको बताएका छन् ।

सिरिया यसरी बन्यो अमेरिका र रूसको अखडा

सन् २०११ मा भएको एक घटनाले सिरियामा गृहयुद्धको रुप लिएको हो । केही मुट्ठीभर बच्चाहरुको गिरफ्तारीबाट शुरू भएको यो संघर्ष दोस्रो विश्वयुद्धपछि विश्वका लागि सबैभन्दा ठूलो मानवीय संकट बनिसकेको छ ।

राष्ट्रपति बसर अल असदवि‍रुद्ध हिंसक प्रदर्शनका क्रममा ३ लाख मानिसले ज्यान गुमाइसकेका छन् । करिब १ करोड मानिसले घरबार गुमाइसकेको अवस्गथा छ । जबकि यो जनसंख्या सिरियाको जनसंसख्याको आधा हो ।

अगस्त २०१२ मा अमेरिकाले यस मामिलमा हस्तक्षेप गर्यो । अमेरिकाले यो देशमा विद्रोहीलाई सघाउँदै आएको छ। मे २०१३ पछि रूस सिरियाको युद्धमा सामेल भयो ।

अमेरिकाले विद्रोहीलाई सघाइरहँदा रसियाले भने असद सरकारलाई सघाउन यहाँ प्रवेश गरेको हो । यसअघि शीत युद्धका क्रममा रूस र अमेरिकाबीच सम्बन्ध बिग्रेको थियो ।

हालैका दिनमा जब यो सम्बन्धमा फेरि तनाव आयो तब वासिङ्गटनले सिरिया मामिलाबारे वार्ताबाट आफ्नो हात झिक्यो । अमेरिकाले सिरियामा रूसमाथि आफ्नो हमलालाई ‘ह्याक’ गरेको आरोप लगाउँदै आएको छ ।

सिरिया आइएआइएसको पनि अखडा

सिरियालाई पहिले अलकायदा र अब आइएसआइएसले पनि आफ्नो लडाइँको मैदान बनाइरहेका छन् । आइएआइएसले पहिले रक्का र त्यसपछि मोसुल शहरमाथि कब्जा जमाएको छ ।
अबु बक्र अल बगदादी यो समूहलाई नेतृत्व गरिरहेका छन् । यसको उद्धेश्य सिरियामा कडा इस्लामिक विचारधारा लागू गर्नु रहेको छ ।

आइएआइएसका आतंकवादीले कब्जामा लिइएका अमेरिकीसँग क्रुर व्यवहार गर्दै आएका छन् । सेप्टेम्बर २०१४ मा अमेरिकी विमानले सिरियामा आइएस आतंकवादीविरुद्ध निशाना बनाउन थालेको थियो ।

अमेरिकासँग गठबंधन देशको सेनामा साउदी अरब, जोर्डन, बहराइन र यूएई पनि सामेल रहेका छन् ।

अमेरिकी कारबाही देखेपछि रुस पनि यो युद्धमा सक्रिय भयो । ३० सेप्टेम्बर २०१५ मा सिरियामा हवाई हमलाका लागि रूसको संसदमा प्रस्ताव पास भयो । र, त्यही दिन साँझ सिरियाको होम्स सहरमा रुसले पहिलो हवाई हमला गर्यो ।

अमेरिकी सेनाको लडाकु जहाजमा मिसाइल आक्रमण

अमेरिकी नौसेनाको लडाकु पानी जहाजमा मिसाइल आक्रमण भएको छ । नौसेनाको पानी जहाजमा यमनतर्फबाट मिसाइल आक्रमण भएको अमेरिकी रक्षा मन्त्रालयलाई उद्धृत गर्दै अन्तराष्ट्रिय सञ्चार माध्ययमले जनाएका छन् ।

सेनाको जहाजलाई निशाना बनाएर हानिएको मिसाइल जहाजमा नलागेकाले ठूलो दुर्घटना टरेको अमेरिकी रक्षा मन्त्रालयको दाबी छ । अमेरिकाले कसले मिसाइल प्रहार गर्यो भन्ने तथ्य सार्वजनिक नगरे पनि यसको जवाफी कारबाही गर्ने तयारी गरेको छ ।

बिबिसीले उल्लेख गरेअनुसार अमेरिकी नौसेनाको जहाजलाई निशाना बनाएर प्रहार भएको मिसाइल यमनको हुथी विद्रोही नियन्त्रित क्षेत्रबाट आएको छ ।अमेरिकी नौसेनाको जहाजमाथि जारी आक्रमणको शृङखलामा यो चार दिनको दोस्रो आक्रमण हो ।

कारोबार दैनिकबाट